Tiranë, 4 gusht, NOA – Ministri i Punëve të Jashtme, Ilir Meta, ka nisur sor u nis sot për një vizitë zyrtare në Qipro, Siri dhe Liban.
Ndalesa e parë, siç bëhet me dijeni nga burimet e dikasterit të Jashtëm për agjencinë e Lajmeve NOA, do të bëhet në Qipro, ku Meta është ftuar nga homologu i tij, Marcos Kyprianou.
Aty mësohet se krahas bisedimeve zyrtare me ministrin qipriot të Punëve të Jashtme, Meta, do të pritet në takime të veçanta nga presidenti i Qipros, Demetris Christofias dhe nga kryetari i Parlamentit, Marios Garoyian.
Në qendër të bisedimeve me personalitetet politike qipriote, pritet të trajtohen çështje që lidhen me thellimin e zgjerimin e mëtejshëm të bashkëpunimit dypalësh, në të gjitha fushat me interes të ndërsjellë, ecuria e integrimit evropian të Shqipërisë, si dhe çështje të bashkëpunimit rajonal.
Gjatë kësaj vizite, do të nënshkruhet “Marrëveshja për nxitjen dhe mbrojtjen reciproke të investimeve”.
Gjithashtu, në datat 7-10 gusht, bëhet me dije se Meta do të zhvillojë vizita zyrtare në Republikën Arabe të Sirisë dhe Republikën e Libanit, ku pritet të takojë zyrtarët më lartë të të dy vendeve ku do të diskutohet në lidhje me çështjet e bashkëpunimit dypalësh dhe shumëpalësh, si dhe për zhvillimet në rajonet respektive.
n.e/NOA
