Tiranë, 5 Gusht, NOA – “Aksioni i sotëm në komunën e Dajtit, në periferi të Tiranës, nuk është kryer nga Inspektoriati Ndërtimor Urbaniastik Kombëtar, por nga pushteti lokal i zonës”.
Ky ka qenë reagimi zyrtar i këtij institucioni lidhur me aksionin që ndërmorën sot fadromat në këtë zonë periferike, për të shkatërruar ndërtime informale, kundër të cilit janë hedhur pronarët e tyre, madje duke arritur deri në konfrontim me policinë.
Sipas Inspektoriatit të Ndërtimit, “strukturat lokale nuk kanë varësi prej tij, por vetëm nga pushteti lokal, si komuna apo bashkia”.
“Duke kërkuar mirëkuptimin, dëshirojmë që të shmangim çdo keqkuptim në lidhje me zhvillimet dhe komentet mbi këtë veprim”, pohojnë drejtuesit e këtij institucioni.
Dhe duke shtuar se për çdo paqartësi në lidhje me çdo zhvillim të mundshëm në të ardhmen për veprime të ngjashme që kanë ose jo lidhje me Inspektoriatin e Ndërtimit, duhet të kontaktojnë drejtuesit e kësaj strukture.
Ditën e sotme, një grua së bashku me katër fëmijët e saj ka kërcënuar se do të hidhej nga banesa nëse ajo do të shembej, ndërsa fadromat kanë shkuar për t'i shembur banesën e saj pa leje në komunën Dajt në afërsi të Tiranës.
Por pas ndërhyrjes së policisë, e cila ka zbritur nga tarraca gruan dhe fëmijët e saj, shembja e ndërtesës ka vijuar.
n.e/NOA
