Nikozia, 5 Gusht, NOA – Edhe pse Shqipëria dhe Qipro ndajnë mendime të kundërta lidhur me statusin e Kosovës, ato shprehin të njëjtin qëndrim se e ardhmja e Kosovës është evropiane dhe se integrimi i saj e i gjithë rajonit në Bashkimin Evropian, është një prioritet i pazëvendësueshëm.
Një fakt i tillë është theksuar gjatë takimit të përbashkët që zhvilloi sot në Qipro ministri i Jashtëm, Ilir Meta dhe homologu i tij qipriot, Markos Kyprianou.
Ky i fundit në veçanti, garantoi se vendi i tij do të ketë një politikë konstruktive ndaj kësaj çështje.
Ndërkaq, bëhet me dijeni se të dy zyrtarët e lartë diskutuan mbi çështje të bashkëpunimit dypalësh dhe intensifikimit të tij në fusha me interes reciprok.
Ata shprehën dëshirën e përbashkët për të zgjeruar veprimtarinë e biznesit, rritjen e investimeve, krijimin e një klime më të favorshme për shkëmbimet ekonomiko-tregtare, nëpërmjet plotësimit të kuadrit ligjor midis dy vendeve tona, sikurse është nënshkrimi i marrëveshjes për shmangien e taksimit të dyfishtë, qe do të sjellë përfitime të ndërsjella për biznesin shqiptar dhe atë qipriot.
Ndërkaq, diplomati qipriot Markos Kyprianou, i komunikoi Metës se vendi i tij do të shpërndajë mbi 100 bursa në vit për studentët shqiptarë, një pjesë e të cilave do të jenë në degën e administrim-hotelerisë.
Nga ana e tij, Meta u shpreh se përsa i takon çështjes së Qipros, Shqipëria ndjek një politikë të jashtme paqësore dhe mbështet një zgjidhje të drejtë, në përmbushje të rezolutave të OKB-së dhe angazhimit të Bashkimit Europian.
“Kjo zgjidhje, - përfundoi ai, - duhet t'u shërbejë të gjithë qytetarëve të Qipros dhe për këtë arsye, iniciativat e presidentit dhe politikës qipriote për një zgjidhje të shpejtë, të qëndrueshme dhe në funksion të së ardhmes, kanë mbështetjen e Shqipërisë”.
n.e/NOA
