Bagdad, 11 gusht, NOA – Pas vendimit të Shteteve të Bashkuara për dhënien fund të operacioneve luftarake nga trupat amerikane më 31 gusht dhe uljen e numrit të ushtarëve në 50 mijë trupa, autoritetet e ushtrisë irakiane deklaruan se Iraku ka nevojë për ndihmën amerikane edhe për dhjetë vitet e ardhshëm, derisa ushtria e Irakut të jetë në gjendje të mbrojë territorin e saj në mënyrë të pavarur nga forcat e huaja.
Kjo deklaratë erdhi nga Shefi i Shtabit të Ushtrisë së Irakut, Gjeneral Lejtnant, Babaker Zebari, i cili në një intervistë dhënë agjencisë franceze të lajmeve, AFP, theksoi se “problemi për ushtrinë e Irakut do të nisë pas 2011-ës, pasi ushtria irakiane do të jetë e gatshme vetëm më 2020”.
Aktualisht në Irak janë vendosur 64 mijë ushtarë.
Gjenerali irakian, Zebari, tha se është e domosdoshme që ushtria amerikane të qëndrojë në Irak, derisa ushtria irakiane të jetë tërësisht e krijuar, gjë që nuk mund të pretendohet para 2020-ës.
mit/NOA
