Durrës, 11 gusht, NOA – Një 38 vjeçar nga Shkodra është ndaluar dje nga policia e Portit të Durrësit pasi po zhdoganonte një motoskaf të vjedhur në Paraguaj, katër vjet më parë.
Burime nga policia portale bënë të ditur se procedimi penal ndaj 38 vjeçarit me iniciale A.Ç, nisi dje.
Sipas policisë së Portit të Durrësit, procedimi penal ndaj tij nisi për shkak dje rreth orës 16.00 38 vjeçari ishte paraqitur në sportelin e dhënies së lejeve të qarkullimit provizore në Komisariatin e Policisë së Portit, për praktikën e zhdoganimit të një motoskafit model Rio 500.
Nga verifikimi i bazës së të dhënave të policisë kufitare, motoskafi rezultoi i vjedhur, në Paraguaj më 14 dhjetor të vitit 2006.
Policia kufitare e Portit të Durrësit ka sekuestruar motoskafin dhe dokumentacionin e tij, ndërsa 38 vjeçari po procedohet në gjendje të lirë për trafikim të mjeteve motorike.
mit/NOA
