Athinë, 13 Gusht, NOA – “Ngjarje të tilla janë të papranueshme dhe nuk bëjnë gjë tjetër veçse nxisin tensione etnike”.
Kjo ka qenë deklarata e mbërritur nga Athina zyrtare lidhur me incidentin e ndodhur në Himarë, ku 35-vjeçari Aristotel Guma gjeti vdekjen, akt ky që ka shkaktuar reagime të shumta dhe u shoqërua me bllokimin për 13 prë të tëra të rrugës së Himarës nga protestues që e cilësuan si të qëllimshme vrasjen e të ndjerit.
Konkretisht, nëpërmjet një deklarate zyrtare të zëdhënësit të ministrit të Jashtëm të Greqisë, Athina ka pohuar se “personat që kanë kryer vrasjen, kanë qenë të motivuar etnikisht”.
Deklarata e publikuar në faqen zyrtare të ministrisë së Jashtme greke, thekson se “ngjarje të tilla dëmtojnë marrëdhëniet mes dy vendeve dhe se duhet të dënohen nga e gjithë shoqëria”.
Ngjarja e rëndë ndodhi në Himarë, dje në orët e mbrëmjes së vonë, pas një sherri për motive etnike, ndërsa, policia e Vlorës ka arrestuar sot 7 persona dhe në kërkim është një i tetë.
Ndërkaq, lidhur me të ka reaguar edhe kryepeshkopi Anastas Janullatos, teksa po punohet në bashkëpunim me prokurorinë e Vlorës, për sqarimin e rrethanave të ngjarjes dhe dokumentimin e plotë ligjor të saj.
n.e/NOA
