Tiranë, 16 gusht, NOA - Drejtoria e Qendrës Spitalore Universitare “Nënë Tereza” ka zbardhur rritjen e pagave për gjithë personalin shëndetësor, ku më të favorizuar duket të jenë mjekët dhe infermierët.
Nga kjo rritje, përfitojnë 2685 punonjës të QSUT-së, ndërkohë që shtesa është e diferencuar sipas profesionit.
Ka qenë vetë drejtori i QSUT-së, Ilir Dashi, i cili ka pohuar se “Shtesa e pagave e miratuar nga qeveria është një stimul që bëhet për mjekët, infermierët dhe gjithë personelin mbështetës”.
Sipas Dashit, aktualisht janë zbardhur vendimet dhe janë duke u hartuar tabelat përfundimtare, për të shpërndarë pagesat në muajin shtator, por sipas drejtorit Dashi, efekti financiar i kësaj shtese ka nisur që në fillim të muajit korrik.
Shtesën më të madhe të pagave e përfitojnë mjekët, infermierët dhe më pas shefat e shërbimeve.
Drejtori i Qendrës Spitalore Universitare, tha ndërkaq se kjo rritje e pagave kërkon një buxhet prej 88.366.880 lekë shtesë gjatë një viti.
Por, personeli shëndetësor përveç rritjes së pagës që bëhet më vendim të Qeverisë, përfiton edhe shpërblime nga të ardhurat dytësore, ashtu siç u aplikuan pak muaj më parë. Duke parë të ardhurat dytësore të realizuara nga shërbimet, sipas drejtorit Ilir Dashi do të ketë të tjera pagesa bonus.
Tabela e rritjes së pagave
Pozicioni Ishte Bëhet
Shef shërbimi Biomedikal 52000 54000
Shef Shërbimi 52000 54000
Mjek kirurg 35000 40000+ vështirësi
Mjek 35000 40000
Kr/infermiere 28000 30500
Infermiere 22000 25000
Infermire onkologjik 26500 28500
Infermire psikiatri 26500 28500
Laborante 23000 25000
Nd/farmacist 22000 24000
Sanitare 18000 19000
Drejtori i QSUT-së, bëri me dije se kjo është paga bazë pa përfshirë rritjet, që bëhen nga vjetërsia në punë, etj. ,.
