Sarandë, 19 gusht 2010 NOA - E Ngarkuara me Punë e Sh.B.A. në Tiranë Deborah Jones ishte në Sarandë sot, për të marrë pjesë në një ceremoni që shënonte përfundimin e projektit të përbashkët të SHBA me Shqipërinë, për të zhvendosur mjete lundrimi ushtarake të mbytura në Portin e Sarandës.
Burime zyrtare nga ambasada amerikane i thanë agjencisë NOA se ceremonia u përcoll gjithashtu nga Zëvendësministri i Mbrojtjes Eqrem Spahia, Ministri i Turizmit dhe Kulturës Ferdinand Xhaferaj, zyrtarë të lartë ushtarakë si dhe stafi i anijes dhe autoritete të portit.
Jones theksoi rëndësinë e shtrirjes dhe zgjerimit të bashkëpunimit. Në vendin e ri ku u zhvendosën anijet ekuipazhi i anijes amerikane vendosi një pllakatë për të shënuar bashkëpunimin me Shqipërinë me këtë dedikim “Kjo gumë i dedikohet shqiptarëve nga Anija e Marinës së Shteteve të Bashkuara Grapple, e cila reflekton partneritetin dhe miqësinë mes Republikës së Shqipërisë dhe Sh.B.A.”
Anija GRAPPLE ka punuar bashkë me qeverinë e Shqipërisë në një projekt me kosto 1.5 milion dollarë për të nxjerrë dhe zhvendosur gjashtë anije, ndërmjet tyre gjuajtës të vegjël dhe silurusa, të fundosur në Portin e Sarandës në vitin 1997.
Anijet u vendosën rreth 10 km larg Portit ku dhe do të kthehen në gumë artificiale. Ky projekt i hap rrugën mundësisë për të zgjeruar më tej Portin e Sarandës. Anija arriti më 27 korrik dhe e mbaroi punën para afatit të përcaktuar.
r.n/NOA
