Tiranë, 28 gusht, NOA – Pas akuzave të deputetit të Partisë Demokratike ka ardhuer dhe reagimi i deputetit të Partisë Socialiste Artan Gaçi. Në një deklaratë për mediat, Gaçi u shpreh se korrupsioni i mazhorancës nuk mund të fshihet., ndërsa i ka kujtuar deputetit të PD-së se mund të paditet në gjykatë.
“Aferat korruptive, që dalin çdo ditë, nga ferra ku rri strukur lepuri i korrupsionit të qeverisë Berisha, janë të pajustifikueshme, e të pambrojtshme Flamur. Për gjithçka the sot, mund të shkosh dhe ti në prokurori a gjykatë, ku mbi 30 çështje presin përgjigje.
Deputeti i PS-së tha se fuqia e ndryshimit do të sjellë dhe çrënjosjen e korrupsionit në qeveri.
“Është e kotë, ferra ku fshihej lepuri i korrupsionit të Sali Berishës ka dalë zbuluar. Fakte dhe prova të reja dalin çdo ditë. Kjo ferrë e korrupsionit do të shkulet, falë fuqisë së ndryshimit të shqiptarëve”, u shpreh Gaçi.
Nga ana tjetër ai ka deklaruar se asnjë deklaratë nuk mund të pastrojë zyrtarët nga korrupsioni.
“Asnjëra prej fjalëve të tua nuk e mbulon dot të vërtetën e madhe: Shqiptarët, tashmë e kanë kuptuar, se janë duke u qeverisur nga një lukuni pushtetarësh, të etur për të grabitur me çdo formë, e përmes çdo mundësie, të gjitha asetet dhe pronat e shqiptarëve”, tha Gaçi.
Ai ka theksuar se “kjo bandë të babëziturish, ku bëjnë pjesë ministra e deputetë, sëbashku me vëllezër, motra e kunetër makutë, po i vjedhin përditë shqiptarët, duke pasuruar çdo ditë e më shumë xhepat e tyre”.
a.k/NOA
