Tiranë, 4 shtator, NOA – Partia Socialiste ka akuzuar sot një tjetër përfaqësuese të mazhorancës për abuzime gjatë procedurave të marrjes në koncesion të hidrocentraleve.
Deputetja e PS-së Vasilika Hysi kërkoi sot nga kolegia e saj demokrate RaJmonda Bulku që të sqarojë procedurat sesi bashkëshorti i saj ka marrë një koncesion për ndërtimin e një hidrocentrali.
“Më lejoni e nderuara kolege, që t'ju uroj të mos ndiqni rrugën e kolegeve të tjera të denoncuara më parë, të cilat gënjyen për ditë me radhë opinionin publik duke zhgënjyer edhe vetë zgjedhësit e tyre”, u shpreh Hysi në një deklaratë të bërë sot për mediat.
Ajo ka kërkuar shpjegime për mënyrën e marrjes së këtij koncesioni duke i drejtuar një sërë pyetjesh publike deputetes Bulku.
“A është e vërtetë se bashkëshorti juaj ka marrë koncesion për ndërtimin e një hidrocentrali? A jeni ju në dijeni?”, tha Hysi.
Nga ana tjetër Hysi ka kërkuar dhe përgjigje për arsyet që e kanë nxjerrë fituese bashkëshortin e Bulkut. “A dini të na thoni, nëse ky fakt është i vërtetë, cilat janë arsyet që e kanë nxjerrë bashkëshortin tuaj fitues në garë?”, tha ajo.
Deputetja e PS-së ka kërkuar sqarime dhe për burimet financiare me të cilat do të ndërtohet hidrocentrali.
“A ka pasur garë në fakt në dhënien e këtij koncesioni, dhe çfarë lidhje ka burri juaj me sektorin e energjisë? Po burimet tuaja financiare për ndërtimin e hidrocentralit cilat janë?”, tha deputetja e PS-së.
Në akuzat e PS-së ka dhe një kërkesë që deputetja Bulku të tregohet e sinqertë në reagimin e saj.
“Duke uruar gjithashtu që ju nuk do të ndiqni as rrugën e shpifjeve e të baltës, presim të mësojmë të vërtetën tuaj, ashtu siç presin të gjithë qytetarët”, tha Hysi.
a.k/NOA
