Tiranë, 8 shtator, NOA – Arritjet e Shqipërisë në zhvillimin kombëtar përdrejt procesit të integrimit ishin në qendër të takimit që Presidenti i Republikës, Bamir Topi zhvilloi sot me Zëvendëssekretaren e Përgjithshme të OKB-së, Asha-Rose Migiro, e cila viziton Shqpërinë prej dy ditësh.
Presidenti e falenderoi zonjën Migiro për mbështetjen e vazhdueshme të OKB-së, duke nënvizuar edhe momentin e zhvillimit të këtij takimi pikërisht kur Shqipëria është në një etapë tepër të rëndësishme të zhvillimit kombëtar, atë të integrimit evropian.
Kryetari i Shtetit, i përmendi zonjës Migiro arritjet e vendit tonë si anëtarësimin në NATO dhe procesin e integrimit sa më të shpejtë në Bashkimin Evropian.
Ndër të tjera kreu i shtetit vuri në dukje rëndësinë që vendi ynë i jep bashkëpunimit rajonal, duke nënvizuar veçanërisht interesin e Shqipërisë për një rajon të stabilizuar e për marrëdhënie të qëndrueshme bashkëpunimi me fqinjët me synim integrimin e përbashkët në familjen evropiane.
Ndërsa pritet që pas pak orësh të nisë edhe shqyrtimi i rezolutës serbe për Kosovën në Asamblenë e Përgjithshme të OKB-së, duke rikonfirmuar besimin në vlerat dhe parimet themelore të OKB-së, Presidenti Topi shprehu mirënjohjen e palës shqiptare për qëndrimin konstant dhe koherent të Sekretarit të Përgjithshëm të OKB-së lidhur me zgjidhjen e çështjes së Kosovës.
“Ne e vlerësojmë të rëndësishme përkrahjen e pavarësisë së Kosovës dhe domosdoshmërinë e njohjes së saj nga vende të tjera, si vendimi më i duhur pas mendimit këshillimor të dhënë nga Gjykata Ndërkombëtare e Drejtësisë,”, mësohet të ketë thënë presidenti Topi në takimin me zëvendëssekretaren e Përgjithshme të OKB-së, duke shtuar se “shpreson dhe uron se në një të ardhme të afërt edhe shteti i ri multietnik i Kosovës do të bëhet anëtar i familjes së madhe të Organizatës së Kombeve të Bashkuara.”
Zëvendëssekretarja e Përgjithshme e OKB-së, Asha-Rose Migiro vlerësoi përparimin dhe disa prej arritjet e vendit tonë në vitet e fundit të cilat “e kanë shndërruar Shqipërinë në një model për rajonin, qoftë përsa u përket përmbushjes së disa prej Objektivave të Zhvillimit të Mijëvjeçarit, apo pjesëmarrjes në projekte të ndryshme si ‘Një OKB’ në fusha me rëndësi të veçantë si demokratizimi i institucioneve, lufta kundër varfërisë, kundër korrupsionit, arsimi, kujdesi shëndetësor, barazia gjinore dhe të drejtat e pakicave. Të dy personalitetet e larta ndanë të njëjtat pikëpamje përsa i përket bashkëpunimit të ngushtë në kuadër të multilateralizmit, sepse sfidat globale me të cilat përballet njerëzimi sot kërkojnë ndërveprim dhe përgjigje globale.
Ndërkaq, Presidenti Topi i përcolli Sekretarit të Përgjithshëm Ban Ki Mun përshëndetjet më të mira duke siguruar për përkushtimin e tij personal dhe institucional në rritjen dhe zgjerimin e marrëdhënieve dhe të bashkëpunimit me Organizatën e Kombeve të Bashkuara në funksion të paqes, qëndrueshmërisë dhe begatisë në botë.
mit/NOA
