Prishtinë, 12 shtator 2010 NOA – Unioni i Gazetarëve të Kosovës (UGK), dënoi sot ashpër sjelljen jo korrekte dhe pengesën në punë të gazetarit të agjencisë së lajmeve “Kosovapress”, z. Alidin Damati, nga ana e policit të Kosovës Isak Jashari, në Mitrovicë.
Pengesa në kryerjen e punës së gazetarit z. Damati, UGK e konsideron si të pa pranueshëm dhe si cenim të shprehjes dhe lëvizjes së lirë të gazetarëve.
Unioni i Gazetarëve të Kosovës thotë se dënon ashpër aktet e tilla të cilat janë të pa pranueshme, dhe goditje e rëndë për realizimin e punëve të gazetarëve.
Ndaj UGK, kërkon nga polica e Kosovës dhe nga Drejtoria e Përgjithshme, që të ndërmarrin menjëherë masa ndaj policit Jashari i cili pa të drejt ka penguar punën e gazetarit.
Unioni po ashtu i bën thirrje z. Isak Jashari, që të kërkojë falje publike për gjestin dhe sjelljen e ulët të treguar ndaj gazetarit të agjencionit, “Kosovapress”.
Nga ana tjetër, UGK, kërkon edhe nga institucionet e Kosovës dhe nga ato ndërkombëtare që të punohet më shumë për përmirësimin kushteve, të cilat janë rënduar për gazetarët kohëve të fundit.
Unioni i bën thirrje edhe Policisë së Kosovës që të jenë më vigjilent në mbrojtje të gazetarëve, në mënyrë që t’u mundësohet kryerja e punës në mënyrë profesionale, e të mos jenë pengesë e tyre në punë.
Kurse në përfundim UGK, i bën thirrje të gjithë kolegëve që të punojnë për lirinë e shprehjes dhe të mos bien preh e provokimeve nga njerëzit që i pengon fjala e lirë.
a.b/NOA
