Tiranë, 21 shtator, NOA – Djegia e kutive të 28 qershorit, siç ka paralajmëruar Komisioni Qendror i Zgjedhjeve, do të digjte negociatat për zgjidhjen e krizës politike në vend, të krijuar pikërisht nga e vërteta e fletëve që gjenden brenda tyre.
Kështu ka deklaruar kryetari i Partisë Socialiste, Edi Rama, në takimet që ka zhvilluar sot me bazën socialiste të Rrëshenit dhe Lezhës, duke shtuar se në një rast të tillë “do të digjeshin negociatat pozitë-opozitë”.
Më tej, ai ka pohuar se opozita duhet të protestojë kundër qeverisë, duke u bërë thirrje anëtarëve dhe simpatizantëve të selisë rozë se “qeveria bie vetëm me protesta”.
Sipas Edi Ramës, 1 milionë të papunë është shifër tepër alarmante, e cila mjafton për ta rrëzuar qeverinë.
“Çmimet e konsumit janë rritur dhe jeta është bërë akoma më e vështirë. Gjithë kjo, duhet të marrë një përgjigje”, tha mes të tjerash Rama.
n.e/NOA
