Shkup, 22 shtator, NOA - Kryeministri i Maqedonisë, Nikolla Gruevski, anuloi pjesëmarrjen e tij në Asamblenë e Përgjithshme në OKB-së.
Mosprania e kryeministrit Gruevski në këtë sesion të 65-të të OKB-së është kritikuar nga diplomatët ndërkombëtarë, por edhe nga shefi i diplomacisë greke, Dimitris Drucas.
Diplomatët perëndimorë kanë vlerësuar se ky takim në Nju Jork do të ishte një mundësi për të diskutuar çështjen e kontestit të emrit me sekretarin e përgjithshëm të OKB-së, Ban Ki Moon, ndërmjetësin e OKB-së për emrin, diplomatin amerikan Metju Nimic si dhe takimi me kryeministrin grek Jorgos Papandreu.
Shefi diplomacisë greke, Dimitris Drucas dje ka shprehur kritika për mospjesëmarrjen e kryeministrit Gruevski.
“Shprehim keqardhje për mospjesëmarrjen e kryeministrit Nikolla Gruevski në Asamblenë e Përgjithshme të OKB-së në Nju Jork, sepse ka ekzistuar mundësia për takim të drejtpërdrejt me kryeministrin Jorgos Papandreu”, deklaroi Drucas.
Qeveria në Shkup sot pasdite njoftoi se në vend të kryeministrit Gruevskit në Asamblenë e përgjithshme të OKB-së do të drejtohet presidenti Gjorgje Ivanov.(INA)
NOA-INA
