Tepelenë, 23 shtator, NOA – Një person është arrestuar sot për vjedhje nga forcat e policisë së Tepelenës, ndërsa është sekuestruar një motorr-karro me vlerë 5.000 euro.
Ngjarja bëhet me dije për agjencinë e Lajmeve NOA prej tyre, duke saktësuar se i ndaluari, është Eduart Sinani, 32 vjeç, lindur në Tepelenë dhe banues në Vlorë.
Arrestimi i tij u bë pasi dje, rreth orës 09.00 të mëngjesit ai kishte shkuar në qytetin e Vlorës në një mandër që shiten automjete bujqësore dhe motor-karro dhe pasi është prezantuar si emigrant dhe i ka treguar se nga është, i ka kërkuar për t’i blerë të zotit të mandrës një motor-karro që ai shiste duke i treguar edhe lekët që kishte për ta blerë.
I lartpërmenduri ka marrë një nga motor-karrot për të bërë një provë dhe pasi e ka ndezur është larguar në drejtim të Tepelenës.
I zoti i mandrës pasi ka pritur rreth një orë menjëherë ka lajmëruar policinë e Vlorës dhe të Tepelenës.
Ndërkaq, forcat e policisë së Tepelenës kanë marrë informacione në rrugë operative përse ky shtetas po lëvizte në orët e mbrëmjes në drejtim të fshatit Dhëmblan të Tepelenës.
Dhe rreth orës 23.00, kanë bërë të mundur që në banesën e një njeriut të tij në fshatin Dhëmblan, të arrestojnë në flagrancë të lartpërmendurin si dhe të sekuestrojnë në cilësinë e provës materiale motor-karron.
Nga ana e policisë u bë arrestimi i shtetasit të lartpërmendur për veprën penale të “Vjedhjes”, vepër kjo e parashikuar nga neni 134 i Kodit Penal, si dhe u bë sekuestrimi në cilësinë e provës materiale i motor-karros.
n.e/NOA
