Lezhë, 24 shtator, NOA – Gjatë kësaj jave, policia e qarkut të Lezhës ka mundur që të shënojë disa raste të identifikimit të autorëve të veprave penale apo kapjes së personave në kërkim.
Të dhënat rreth tyre publikohen për agjencinë e Lajmeve NOA duke pohuar se në listë i pari është rasti i identifikimit të një banori të Lezhës, si autor i dyshuar i dy vjedhjeve të kryera gjatë ditës në njësi tregëtare në Durrës.
Si edhe kapja e personit të kërkuar Gjon Brahja, i akuzuar për mbajtje pa leje të armëve të zjarrit.
Ndërkaq, forcat policore të Lezhës bëjnë me dijeni se kanë mundur të kapin edhe personin e kërkuar Ernest Gila, i akuzuar për vjedhjen me dhunë në bashkëpunim të një 61-vjecari në Durrës.
Sikundër edhe atë të personit të kërkuar Ilirian Buci, akuzuar për veprat penale të shkeljes së rregullave të qarkullimit rrugor dhe largimit nga vendi i aksidentit, lidhur me aksidentin me pasojë vdekje të një të mituri në rrethin e Krujës.
Në fund, renditet kapja e personit të kërkuar Fatos Gosa i akuzuar për veprën penale të ushtrimit të ndikimit të paligjshëm ndaj personave që ushtrojnë funksione publike pasi dyshohet se ka ndërmjetësuar dhënien e lejeve të burgosurve në Burgun e Peqinit.
Si edhe identifikimi e kapja e disa personave të akuzuar si të implikuar në një numër të konsiderueshëm vjedhje banesash, tentativa vjedhje automjetesh, madje edhe në vjedhje të kryera me dhunë.
n.e/NOA
