Tiranë, 2 tetor, NOA – Selia rozë ka vijuar akuzat për përfshirjen e Ministres së Integrimit, Majlinda Bregu në afera kriminale me mafian italiane.
Anëtarja e Asamblesë Kombëtare të Partisë Socialiste, Megi Ajtyreza deklaroi përpara mediave se është e pamundur që kryeministri Sali Berisha të mos përgjigjet për lidhjet e mbesës së tij me organizatën kriminale mafioze italiane “Sacra Corona Unita”.
“Si ka mundësi që ministrja e Integrimit, Majlinda Bregu nuk distancohet nga lidhja e kunatit dhe motrës së saj me të birin e supermafiozit italian Prudentino, por përkundrazi e merr këtë supermafioz në mbrojtje”, nënvizoi rishtaz Ajtyreza.
Ajo e cilësoi pafytyrësi mospërgjigjen e kryeministrit Sali Berisha, apo distancimin e tij nga këto lajme të ditës, që kanë mbushur bujshëm jo vetëm shtypin shqiptar, por dhe atë ndërkombëtar.
Duke iu referuar daljeve me kundërakuza nga PD, Ajtyreza nënvizoi se akuzat e PD-së ndaj liderit të opozitës të përsëritura paturpësisht prej 10 vjetësh e kanë marrë përgjigjen nga gjykata.
mit/NOA
