Tiranë, 4 tetor, NOA – “Çdo deputet është sovran për vendimet e tij, për sot dhe për të ardhmen”. Me një deklaratë të tillë, kryetari i Lëvizjes Socialiste për Integrim, Ilir Meta, i është përgjigjur interesimit të gazetarëve lidhur me afrimin e mundshëm të deputetit Vangjel Tavo, pranë strukturave të kësaj force politike, tani që ka deklaruar largimin e tij nga Partia Socialiste.
“Duke qenë se kjo është një çështje për LSI-në, ju mund t’i drejtoheni sekretarit të përgjithshëm të saj, Luan Rama. Ajo që unë dua të theksoj dhe që ua kam komunikuar dhe para pak ditësh, kur ishim duke vizituar ambienmtet e QKL-së, ka të bëjë me këtë fakt që, kjo është një mazhorancë shumë solide”, tha Meta në lidhje me këtë argument.
Duke shtuar se kjo është një mazhorancë, e cila do të përmbushë gjithnjë e më mirë, me përgjegjësi gjithnjë e më të madhe, me transparencë në rritje, të gjitha detyrimet që ka marrë në programin e qeverisë një vit më parë deri në 28 qershor të vitit 2013.
“Kjo është një mazhorancë që qëndron mbi bazën e një marrëveshjeje politike. Cilido që ka pikëpyetje për solidaritetin e saj, askush nuk e ka penguar që të bëjë verifikimin përkatës. Por, e theksoj edhe njëherë tjetër që, kjo është një mazhorancë që deri në 28 qershor të vitit 2013 do të përmbushë të gjitha detyrimet e saj dhe natyrisht pas 28 qershorit të vitit 2013 do t’u mbetet shqiptarëve për të përcaktuar mazhorancën e ardhshme. Ata që nuk kanë durim deri në vitin 2013, tregojnë mungesë profesionalizimi, por edhe përgjegjësie në sjelljen e tyre politike”, përfundoi konceptin e tij Meta, mbi koalicionin qeverisës dhe qëndrueshmërinë e tij.
n.e/NOA
