Romë, 5 tetor, NOA - Po të mos ishin zbulimet e biologut britanik, Robert Eduards, sot nuk do të ekzistonte tregu i vezoreve, embrionet e ngrira që përfundojnë të vdekur apo fëmijë të lindur nga nëna të marra me qera.
Kështu e ka cilësuar Selia e Shenjtë në Vatikan punën e njeriut që u vlerësua dje me çmimin Nobel, shkencëtarit që ka shpikur fekondimin in vitro.
Ka qenë pikërisht kreu i Akademisë Papnore për Jetën, Ignacio Carrasco de Paula, i cili ka reaguar kundër Komitetit të Çmimit Nobel, i cili i ka akorduar çmimin e sivjetshëm të mjekësisë, njeriut që krijoi fekondimin in vitro.
Nderimin e shkencëtarit Robert Eduards, Selia e Shenjtë e cilësoi si një zgjedhje absolutisht të papranueshme, duke pohuar se mbi këtë vendim ngrihen pikëpyetje të mëdha morale.
Robert Eduards, biologu 85-vjeçar është fituesi i çmimit Nobel në Mjekësi, pasi solli në jetë fëmijën e parë që lindi nga teknika e njohur si fekondimi “in vitro”.
E që nga ai moment, i cili përkon me disa dekada më parë, rreth 4 milionë fëmijë kanë lindur në 30 vitet e fundit me lindje artificiale.
n.e/NOA
