Tiranë, 6 tetor, NOA – Grupi kuvendor i Partisë Socialiste ka marrë vendimin që të bojkotojë votimin e çdo ligji që është për tu miratuar në rendin e ditës së seancës së nesërme plenare.
Ky vendim u bë i qartë pas përfundimit të mbledhjes së grupit kuvendor të PS-së, e drejtuar sot nga nënkryetari i këtij grupi, deputeti Erion Braçe.
Deputetët e Partisë Socialiste kanë vendosur të jenë në sallën e kuvendit përgjatë 90 minutëshit të diskutimit të lirë, dhe më pas pritet që ata ta bojktotojnë seancën gjatë miratimit të projektligjeve në rendin e ditës.
Qysh në fillim të këtij sesioni parlamentar kjo mënyrë është bërë tashmë mëse e qartë, kur pas një lumi akuzash të ndërsjella nga foltorja e kuvendit, opozita në fund të debatit, braktis seancën, ndërsa mazhoranca voton me numrat e saj në kuvend projektligjet në axhendë.
mit/NOA
