Tiranë, 6 tetor, NOA – Ministri i Energjetikës, Ilir Meta ka ndjekur nga afër sot situatën hidrike në kaskadën e lumit Drin, ku për këtë qëllim, së bashku me drejtorin e KESH-it, Ëngjëll Zeqo, ai ka qenë për inspektim në hidrocentralin e Vaut të Dejës.
Siç bëjnë me dije burimet zyrtare të METE-s për agjencinë e Lajmeve NOA, Meta atje ka diskutuar në lidhje me situatën dhe masat e marra, në mënyrë që prurjet e mëdha të reshjeve të mos sjellin pasoja për popullatën që shtrihet në veriperëndim të vendit.
Më pas, ministri i Energjetikës ka udhëtuar drejt Shkodrës, ku ka zhvilluar një mbledhje me Shtabin e Emergjencës Civile.
Në këtë takim, Ilir Meta ka diskutuar lidhur me masat që duhet të merren në mënyrë që të mos përsëritet më një situatë si ajo e vitit të shkuar.
Në një prononcim për median, Meta u shpreh se gatishmëria e autoriteteve është maksimale dhe situata në kaskadën e lumit Drin është nën kontroll.
“Situata në kaskadën e Drinit është totalisht nën kontroll. Niveli i detyruar i shkarkimeve është në minimum dhe nuk paraqet asnjë problem aktualisht. Njëkohësisht, edhe situata në hidrocentralin e Fierzës është plotësisht e monitorueshme dhe pa asnjë problem”, tha ai.
Duke shtuar se nëse vazhdon kjo situatë meteorologjike, Koorporata Elektroenergjetike Shqiptare do të fillojë të eksportojë energji elektrike në mënyrë që të ruhet e gjithë rezerva për të përballuar prurje më të larta në ditët e ardhshme.
n.e/NOA
