Shkodër, 8 tetor, NOA – Forcat e policisë kufitare të Shkodrës kanë mundur të kapin në flagrancë 24 coli cigare të markës ‘Trokodero’ dhe të bllokojnë mjetin lundrues tip sule metalike, i cili shërbente për transportin e këtij malli kontrabandë, të ardhur nga Mali i Zi në drejtim të territorit shqiptar.
Ngjarja konfirmohet prej tyre për agjencinë e Lajmeve NOA, duke saktësuar se ajo ka ndodhur përkatësisht në vendin e quajtur Shegan, të Malësisë së Madhe.
Bllokimi i këtij malli kontrabandë, u bë i mundur në bazë të informacioneve të marra në rrugë operative nga shërbimet e policisë kufitare, në stacionin e pikës kufitare të Bajzës në Malësinë e Madhe.
Nga ana e policisë po kryen veprimet e duhura proceduriale si dhe po punohet për identifikimin dhe kapjen e shtetasve, të cilët trasportonin mallin e lartpërmendur, ndërsa materialet e rastit në fjalë, do t’i kalojnë për veprime të mëtejshme prokurorisë së Shkodrës.
n.e/NOA
