Prishtinë, 8 tetor, NOA - Policia e Kosovës dhe misioni i OSBE-së filluan fushatën për siguri në komunikacionin rrugor duke informuar publikun, me qëllimin e reduktimit të aksidenteve në Kosovë.
Fushata inkurajon shoferët që të mendojnë se si sjellja e tyre mund të shkaktojë lëndime dhe vdekje, gjithashtu i informon edhe për gjobat që kanë të bëjnë me shpejtësinë, mospërdorimin e rripit të sigurisë, mosdhënien e përparësisë këmbësorëve dhe kalimin nëpër dritën e kuqe të semaforit.
Misioni i OSBE-së ka financuar një fushatë për sigurinë në trafik në vitin 2008, dhe në muajt në vijim numri i aksidenteve kishte rënë për 7 për qind.
“Ne shpresojmë që kjo fushatë do të krijojë kushte për trafik më të sigurt për të gjithë në Kosovë”, tha Carsten Tvelmeir. drejtor i departamentit të OSBE për siguri të publikut.
“Policia e Kosovës është duke bërë çmos që të kontrollojë trafikun dhe të reduktojë numrin e aksidenteve”, tha Shpend Maxhuni, zv/drejtor i përgjithshëm për shtyllën e Operativës.
Fushata përfshin transmetimet e spoteve në televizione dhe radio, vendosjen e bill-bordeve, si dhe shpërndarjen e 300.000 fletëpalosjeve (të printuara në katër gjuhë: shqipe, angleze, serbe dhe turke) nga patrullat e policisë për siguri të trafikut.
n.e/NOA
