Nga ana tjetër, Illyricum Libertas u bën thirrje Institucioneve europiane që të përshpejtojnë procesin eurointegrues edhe për Republikën e Kosovës
Tetovë, 9 tetor 2010 NOA/ Zulejha Ramadani - Shoqata për mbrojtjen dhe afirmimin e identitetit kombëtar Illyricum Libertas me seli në Tetovë, përshëndeti sot vendimin e Parlamentit Europian për heqjen e vizave për Republikën e Shqipërisë dhe për shtetin fqinj dhe mik të Bosnjë – Hercegovinës.
Ky është një moment shumë i rëndësishëm në rrugën e gjatë dhe të mundimshme të popullit tonë dhe popullit boshnjak drejt Europës nënë, thotë organizata.
Ajo veçon se kjo është një arritje e madhe e përbashkët e institucioneve të shtetit shqiptar, e klasës politike në përgjithësi dhe e popullit të shumëvuajtur shqiptar.
Njëkohësisht, kërkojmë nga institucionet përkatëse të Bashkimit Europian që të përshpejtojnë procesin për integrimin sa më të shpejtë dhe të plotë të Shqipërisë dhe Bosnjë-Hercegovinës në Union.
Nga ana tjetër, Illyricum Libertas u bën thirrje Institucioneve europiane që të përshpejtojnë procesin eurointegrues edhe për Republikën e Kosovës.
Si një hap i menjëhershëm i vullnetit të mirë në këtë drejtim do të ishte heqja e regjimit bllokues të vizave edhe për qytetarët e Republikës së Kosovës.
Popuj të barabartë në një Europë demokratike dhe të lirë, shtëpi e përbashkët e gjithë popujve europianë.
z.r/NOA
