Tiranë, 13 tetor, NOA/ Milena Selimi - Me regji dhe skenar nga Franziska Buchsot sot në mbrëmje në orën 19.00 do të shfaqet në Akademinë e Filmit Marubi filmi artistik “Emil dhe dedektivët”.
Romani i Erich Kästner "Emil dhe detektivët" është një ndër klasikët e letërsisë gjermane për fëmijë.
Botuar për herë të parë në vitin 1929, ai lexohet dhe pëlqehet ende nga fëmijët.
Një sukses ky, që çoi në përkthimin e tij në 60 gjuhë dhe realizime të shumta filmike.
Me rastin e inskenimit teatror nën të njëjtin titull me nxënës shqiptarë, të cilët e kanë transferuar përmbajtjen e veprës në Shqipëri do të shfaqet tanimë edhe në Tiranë realizimi i fundit filmik i saj, i cili është përshtatur për situatën aktuale në Gjermani. Krahas situatave emocionuese dhe plot humor filmi ofron mundësinë për të gjetur ngjashmëritë e dallimet dhe për të mësuar diçka më shumë për të dy vendet.
Sekreti i suksesit të kësaj vepre klasike, përveç tensionit dhe humorit të saj, qëndron sidomos në imazhin e fëmijëve që ajo projekton: fëmijët mund të jenë më të fortë se sa të rriturit, nëse ata janë të guximshëm dhe kokëfortë.
Si përfundim, miqësia dhe drejtësia triumfojnë.
Cili i rritur nuk do ta donte këtë?
Filmi do të shfaqet në gjermanisht me titra në shqip, ndërsa hyrja është e lirë për të gjithë artdashësit e kinemasë.
m.s/mit/NOA
