Tiranë, 13 tetor, NOA - Sllovenia u ka dhënë një mbështetje të madhe proceseve integruese të Shqipërisë si dhe në procesin e fundit, të heqjes së vizave dhe lëvizjes së lirë të shqiptarëve, prandaj ajo duhet falënderuar për një aksion të tillë.
Një fakt të tillë kryetarja e Kuvendit Jozefina Topalli ia ka bërë sot me dije homologut slloven, Pavel Gantar, gjatë një takimi të përbashkët, ndërsa ky i fundit ndodhet në Tiranë për një vizitë zyrtare.
“Nuk është rastësi që pikërisht sot vetëm pak ditë pas datës 7 tetor kur PE votoi për liberalizimin e vizave, kryetari i Parlamentit të Sllovenisë ndodhet në Shqipëri. Unë shfrytëzova rastin për ta falënderuar përzemërsisht, për të gjithë kontributin dhe mbështetjen që vendi i tij ka dhënë për integrimin e Shqipërisë”, tha Topalli në fjalën e saj.Duke shtuar se Sllovenia ka qenë një ndër vendet e Bashkimit Evropian, që në filozofinë e tyre dhe në praktikën e tyre kanë qenë mbrojtësit kryesorë të zgjerimit të BE drejt Ballkanit Perëndimor.
Ndërsa Gantar komunikoi se është i sigurt se të gjitha institucionet e tjera europiane do ta ndjekin vendimin e Parlamentit Evropian për heqjen e vizave dhe se beson që liberalizimi i vizave do të ndodhë në fund të vitit. “Liberalizimi i vizave nuk është aq i rëndësishëm për politikanët sa është për qytetarët, pasi ata mund të udhëtojnë pa kufizime administrative dhe jam i sigurt se do të mund të vizitojmë njëri-tjetrin më shpesh”, tha ai.
n.e/NOA
