Prishtinë, 17 Tetor 2010 - Ish-presidenti i Kosovës dhe njëkohësisht kryetar i LDK-së, Fatmir Sejdiu deklaron se tërheqja e partisë së tij nga koalicioni qeverisës ishte reagim dhe përgjigje ndaj, siç e quajti, injorimit nga partneri i saj - PDK.
Sejdiu tha se kohët e fundit ka patur qasje jo parimore dhe të padrejtë nga partneri në koalicionin e deritashëm e posaçërisht në rastin e strategjisë së privatizimit të Postë dhe Telekomit të Kosovës.
Strategjia për PTK-në, që ka ngjallur debate të mëdha në Kosovë, kaloi në Kuvend përmes një votimi që u cilësua si i debatueshëm.
Sejdiu tha se nuk e cilëson këtë si një “kohë të përmbysjes” së institucioneve të vendit por si një sfidë normale që, sipas tij, të gjendet formula e ecjes së mëtejme në zgjedhjet parlamentare. Në bisedë me BBC-në ish-presidenti Sejdiu tha se për dalje nga kriza aktuale duhet të përfillen të gjitha rrugët kushtetuese dhe ligjore përpara se të vendoset për të ecur drejt zgjedhjeve të jashtëzakonshme. Ai tha se me vendimin e LDK-së për dalje nga koalicioni qeverisës nuk janë rrezikuar proceset e Kosovës në rrafshin ndërkombëtar.
Pse LDK vendosi të dalë nga koalicioni qeverisës një ditë pasi u shpall data e zgjedhjeve të parakohshme? Them së është marrë një vendim pas një analize të thellë që i është bërë proceseve të fundit në Kosovë, pra zhvillimeve që i kemi patur para vetes. Posaçërisht zhvillimeve që kanë ndodhur ditën e enjte duke patur parasysh që partneri i koalicionit nuk ka denjuar që të mbajë një respekt të bashkëpunimit të nevojshëm edhe institucional por edhe të partneritetit edhe me LDK-në për të kapërcyer një projekt në rrugën më të mirë. Nuk flas vetëm për çështjen e procedurave që janë gjithnjë të nevojshme të përputhen dhe bashkohen energjitë por në të njëjtën kohë edhe të hulumtimit të variantit më të mirë çka është në interes të Kosovës. Me ketë dua të them se LDK-ja, gjithmonë edhe tani edhe më herët, ka në fokus të vetin apo objektiv program ekonominë e tregut dhe nuk është kundër procesit të privatizimit, siç dëshirohet t’i vishet sikur ka qasje retrograde për këtë proces . Përkundrazi ajo ka shtruar që në fillim edhe idenë me projektin e saj politik por në të njëjtën kohë edhe me veprimet e tjera të mëvonshme si mbështetje të proceseve më të mira. Ajo që ndodhi ditën e enjte, ishte një arsye e një qasjeje joracionale dhe një pjesë do ta quaja të një gare joparimore për të shtyrë një proces pa ujdi, një proces që nënkupton kapërcimin edhe të asaj që është marrëveshje e nevojshme apo edhe e domosdoshme për procesin. Unë nuk dua të them se nuk është liria e deputetëve që të vlerësojnë dhe të japin edhe qasjen e tyre personale si përfaqësues të qytetarëve të vendit, por mund të them se është pjesë e prezantimit të formacionit politik. Ajo që ka ndodhur të enjten që praktikisht edhe të anashkalohen procedurat demokratike të parapara me rregulloren e punës dhe mënyra insistuese e mëvonshme që ajo të “shitet” gjithsesi në opinion, se ka qenë gjithçka në rregull, mendoj se ka qenë diçka që ka shtuar edhe më tepër pjesën e reagimit tonë. Dhe duke patur parasysh po të njëjtën kohë se ka edhe procese të tjera që kanë qenë të kësaj periudhe që në një ose mënyrën tjetër kanë ndikuar edhe në largimin nga ajo pjesë e aksioneve të përbashkëta ne pjesën e qeverisjes edhe në aspekte të tjera. Unë kam dashur që të bëjë një analizë të thellë së bashku me të gjithë anëtarët e kryesisë dhe them se ka qenë edhe qasje e tyre, edhe në nismat e drejtpërdrejta, që t’i jepet përgjigje kësaj situate, duke mos dashur asnjëherë që kjo të kuptohet si vullnet, që tani po përshkruhet, i LDK-së që vendin ta fus në krizë institucionale. Ne e kemi respektuar vendimin e kryetarit të Kuvendit, që njëkohësisht ushtron detyrën e presidentit që zgjedhjet e parakohshme të mbahen më 13 shkurt, ani pse e kemi patur një datë tjetër të propozuar besoj edhe shumë subjekte të tjera meqë e dimë se gjysma prej tyre kanë thënë qoftë gjysmën e shkurtit, qoftë edhe më vonë, por gjithmonë me intencën që ato të jenë në përputhje me afatet kushtetuese dhe ligjore. Pavarësisht nga kjo kryetari i Kuvendit, përkatësisht ushtruesi i detyrës së presidentit, ka marrë këtë vendim dhe ne e respektojmë. Në këtë kuadër dua të them se ne do të jemi partner serioz në proceset e rëndësishme që duhet të kapërcejë vendi, flas edhe në këtë periudhë, apo në këtë mezokohë, për të marrë vendime të rëndësishme siç është çështja e buxhetit të shtetit apo aspekte të tjera sa i përket ligjeve të caktuara. Pra, LDK-ja nuk do të bëjë obstruksione do të jetë bashkëpunuese në rolin e vet si parti parlamentare me numrin e deputetëve që ka. Por në të njëjtën kohë ka bërë një hap që më tepër mund të jetë një sinjal që nxit dhe forcon kujdesin për demokracinë. Në këtë kuadër të mos mbetemi asnjëherë që pjesa e demokracinë nënkupton edhe kapërcimin e rregullave të punës apo edhe të fair play-it të partnerëve të koalicionit. Të jetë si të jetë ne na pret një sfidë e përbashkët për të gjithë. Unë mendoj se ka bazë kushtetuese dhe ligjore që kjo gjendje të menaxhohet si duhet. LDK-ja nuk do të jetë subjekt që do të ketë tatëpjetën në procese të konsolidimit të ecjes në këtë kohë deri në zgjedhjet e paralajmëruara dhe në proceset e mëtejmë që të shikohet se cili do të jetë vendimi i qytetarëve të vendit për njerëzit që do të dalin me projekte të caktuara për të marrë besimin e tyre. Me sa e kuptoj ju po e akuzoni partnerin tuaj në koalicionin e deritashëm, për mos respektim të partneritetit? Unë them se në këto kohët e fundit dhe pikërisht në këtë moment është një qasje jo parimore dhe jo e drejtë nga vetë fakti se në këto ditët e fundit kur ka qenë çështja e debatit të strategjisë për privatizimin e PTK-së nuk ka patur një insistim bashkëpunues apo një respekt për propozimet që janë dhënë nga ana e partnerit të koalicionit për të patur një ecje të kujdesshme e cila do të mblidhte energjitë e përbashkëta edhe të subjekteve të tjera politike. Prandaj nëse do të ishte shtruar ambicia kësisoj se “unë bëj edhe pa ty” atëherë do të ishte edhe një përgjigje se “në rregull ke hapësirën dhe në do të tërhiqemi nga ky pozicion edhe përgjegjës në kuptimin e qeverisjes ndërsa do të vazhdojmë me jetën parlamentare”. Si mendoni t’i realizoni apo t’i përmbushni detyrat tuaja kur ju keni kërkuar si kryesi e LDK-së tërheqjen e plotë të të gjithë anëtarëve tuaj nga qeveria? Sejdiu: Ka zgjidhje kushtetuese … Cilat janë ato zgjidhje kushtetuese? Ka zgjidhje se kryeministri mund të ecë në një proces të konsolidimit teknik, të qeverisë së Republikës, për aq kohë sa do të jetë e nevojshme. Nëse do të ketë ide, siç dëgjoj ndonjëherë, të tërhiqet nga qeveria do të ketë përpjekje për një konsolidim të një qeverie prapë me një mandatim të ri nga ana e ushtruesit të detyrës, dhe nëse jo atëherë do të ketë edhe zgjedhje të tjera gjatë kësaj periudhe. Pra janë gjithmonë mirë të parapara procedurat ligjore dhe kushtetuese. Ne nuk duam që të themi se po hyjmë në një zingjir të situatave të krizës por duam që edhe kjo pjesë pavarësisht nga akti që ka marrë LDK-ja, të jetë një akt i sinjalit edhe për zgjuarsinë që duhet të kenë institucionet e vendit për t’u sprovuar apo sfiduar edhe situatat e tilla që mund të vijnë. Unë di se shumë vende kanë patur situate të ngjashme dhe të mos marrë vende që nuk janë larg nesh e që kanë patur ndërrime apo ndryshime në qeveri për periudha të shkurtra kohore. Unë s’them se Kosova duhet të përcjellë atë trend të ndryshimeve të shpejta apo afatshkurtra që mund të jenë në jetëgjatësinë e një qeverie, por pavarësisht nga kjo unë them se gjithmonë duhet të gjendet një qelës racional dhe i urtë që sjellë pastaj një ecje sa do të nevojitet deri në pjesën e kompozimit të institucionit më të lartë të legjislativit të vendit. Më thoni shkurt nëse e keni futur Kosovën në zgjedhjet e jashtëzakonshme me vendimin që keni marrë si LDK? Jo! Ne e kemi futur idenë se LDK-ja në këtë mënyrë e ndjenë joracionale praninë e saj në qeveri duke patur parasysh injorimin e idesë së saj apo prezantimit të përfaqësuesve të saj për një projekt të caktuar që është shumë i rëndësishëm për Kosovën. Unë them se do të ishte shumë e palogjikshme që të vazhdohet me një qasje të pranisë në kuptimin kur partneri tjetër i koalicionit nuk do që të llogaris në praninë tonë. Meqë keni kritika për strategjinë e privatizimit të PTK-së, ajo qe paralajmëruar më herët. Partneri juaj në koalicion ka deklaruar se ka patur edhe marrëveshje të mëhershme për strategjinë? Jo, ka patur biseda për t’u bërë projekti siç duhet, por natyrisht se fjala e fundit është ajo që jepet në Kuvendin e vendit. Unë e di se ka patur debate e “debate”. Unë nuk do të lëshohem në finesat apo formulat që janë thënë aty, sepse ka qenë çështje e Kuvendit dhe e përgatitjes së projektit nga ana e qeverisë por dua të them në pjesën e insistimit politik që do të thosha se është krejt normale që ky projekt I rëndësishëm për të ardhmen e vendit të jetë projekt i pjekur mirë, të jetë në interesin e të gjithë qytetarëve të vendit dhe të jetë i përputhshëm me ligjshmërinë edhe të çmimit në tregun ndërkombëtar. Nuk dua të them se sa ka qenë çmimi, si ka qenë ideja si duhet të privatizohet, por dua të them se kërkesa themelore ka qenë të bëhet mirë. Prandaj nuk është bërë “nami”, me kërkesën që të kërkohet edhe pak kohë, që të ketë një harmonizim dhe shpjegim më të mirë bindës për deputetët dhe kjo ide nuk kapërcej dhe kjo nuk paraqet hidhërim të madh. Më tepër mund të jetë pjesa e qasjes së mëvonshme joracionale e insistimit të domosdoshëm që të shkohet në votim dhe kjo u bë por insistimi ishte për të thënë se ishte proces i rregullt i marrjes së vendimit për diçka që nuk ishte në rregull. A nuk kishte mënyra të tjera për të kapërcyer problemin përveç daljes nga koalicioni? A nuk paraqet kjo një lloj shfryrje e mllefit dhe inatit? Jo unë them se mund të jetë vetëm një element i dhënies së përgjigjes për sfidimin që është bërë. Sepse në fund të fundit, deshëm apo s’deshëm ne çdo subjekt politik ka identitetin e tij, dhe jo që me atë identitet të ndërtohet inati apo mëria ndaj një tjetri subjekt apo rivaliteti i ashpërsuar. Por unë them se është pasqyrë e secilit se me çfarë projekti apo identiteti shprehet edhe para njerëzve të vendit dhe para përgjegjësive që kanë, pra edhe institucional në këtë kuadër. Kjo qasje i imponuar në këtë mënyrë, që unë them se nuk është në interes të vendit, nuk është interes as i PDK-së dhe as i LDK-së dhe as i partive të tjera të ndodh diçka që të ketë refuzimin e të gjithë të tjerave. Ju e keni parë se edhe partitë opozitare e kanë lëshuar sallën, Pra ishte një reagim që ka patur ndikimin e saj dhe unë them se Kosova në këtë kohë, pavarësisht nga ky moment mund të gjejë zgjidhje racionale për të menaxhuar kohën dhe them se duhet të zhvillohen debate të përbashkëta dhe këshillime të nevojshme edhe me të gjithë miqtë e Kosovës që kanë qenë pranë vendit në momente shumë të rënda dhe mendoj se edhe në këtë kohë që unë nuk e cilësoj si “kohë të përmbysjes” së institucioneve të vendit por një sfidë normale e vënies në sprovë të reagimit që të gjendet formula e ecjes së mëtejme në zgjedhjet parlamentare dhe atëherë do të sprovohen forcat e secilit subjekt politik. Ju thoni zgjedhjet parlamentare, por a mund të zhvendoset data e zgjedhjeve të parakohshme pas këtij hapi tuaj? Mund të them se ka zgjidhje kushtetuese dhe ligjore. Është një zgjidhje që është ofruar e kësaj natyre dhe nëse do të ketë qëllim që të shkohet në zgjedhje të mëhershme atëherë janë mekanizmat që duhet të vihen në sprovë. Po e zëmë se nuk ka mundësi qeveria, apo PDK-ja më e numërta në Parlament që të formojë qeverinë atëherë duhet të jetë oferta për subjektin tjetër. Unë them se gjithmonë ka rrugë edhe në këso situatash dhe me sa i kam përcjellë reagimet e subjekteve të tjera askush nuk është i prirur që të krijojë diçka që nuk do të ketë kokë. Pra që të mos mbetet ecja jonë e paorientim por do të jetë një qasje racionale që do të zgjidhet, Në këtë kuadër unë them se duhet të përfillet rruga kushtetuese dhe ligjore dhe s’them se duhet të ndodh kjo ose ajo por duhet të përfillet ligjshmëria. Por a nuk i keni rrezikuar të gjithë proceset e Kosovës me vendimin që keni marrë përfshirë edhe bisedimet edhe me BE-në dhe me Serbinë? Jo, unë them se jo. Është një vendim që ka peshën e vetë në kuptimin e sprovës flas edhe për gjeturinë tonë dhe në të njëjtën kohë unë dua të them se LDK-ja asnjëherë nuk ka qenë kundër ecjes sa më të shpejtë në proceset integruese, në proceset e bashkëpunimit me faktorët e rëndësishëm evropianë dhe SHBA-në dhe vendet e tjera që na kanë ndihmuar. LDK-ja nuk ka qenë asnjëherë kundër procesit të bisedimeve. Ne kemi qenë që të zhvillohen bisedime në nivel të shteteve sovrane, si palë të barabarta, për çka kemi edhe një udhëzim që ka dalë nga Rezoluta e OKB-së në sesionin e fundit gjatë shtatorit. Unë mendoj se natyra e bisedimeve duhet të jetë në rrafshin e zgjidhjes së problemeve praktike apo teknike.
FUND
