Shkodër, 18 tetor, NOA – Pas 13 vitesh, Policia e Shkodrës ka zbuluar një vrasje të ndodhur në vitin 1997, ku gjeti vdekjen Ndrec Zeka nga fshati Rrenc në komunën e Gurit të Zi.
Lidhur me vrasjen e 13 viteve më parë policia e Shkodrës bën të ditur se ka zbuluar dhe prangosur sot bashkëautorin e krimit, 47 vjeçarin Çezarin Mati Jaku, ndërsa ka shpallur në kërkim të atin e tij, Mati Jaku, bashkëautor në krim.
Drejtoria e Policisë së Shkodrës si rezultat e një hetimi tremujor finalizoi me sukses operacionin policor të koduar “Vrasja e Vjetër”, duke dokumentuar kështu vrasjen e Ndrec Zekës nga vrasësit Çezarin Mati Jaku, dhe babai i tij, 65 vjeçari Mati Jaku, lindur dhe banues në Fshatin Rrenc të komunës Gur i Zi, në Shkodër.
Gjatë kontrollit të ushtruar nga shërbimet policore në banesën e Çezarin Jakut u gjetën dhe sekuestruan si provë materiale një armë zjarri luftarake automatik,
një hark për hedhje shigjete me dylbi, dy radio ndërlidhje, një telefon, një palë pranga, 6 mekanizima të shkrepjes, 3 shtrate shuli, për pushkë model 56 si dhe 791 copë fishekë luftarake Mod. 56.
Policia e Shkodrës ka kryer të gjitha veprimet e duhura proceduriale e hetimore dhe materialet në ngarkim të autorit të vrasjes, Çezarin Jaku, iu kaluan Prokurorisë së Shkodrës.
I arrestuari po ndiqet penalisht për veprën e vrasjes me dashje të kryer në bashkëpunim dhe prodhim e mbajtje armësh dhe municionesh luftarake pa leje.
Bashkëautori i vrasjes, Mati Jaku është shpallur në kërkim nga policia e Shkodrës dhe po punohet intensivisht për kapjen e tij.
mit/NOA
