Tiranë, 19 Tetor, NOA – “Shqipëria, është tashmë një vend modern evropian në zhvillim dhe në rrugën solide drejt integrimit evropian”. Ky ka qenë konstatimi i bërë para kryeministrit Berisha, nga ana e kryetarit të Senatit të Mbretërisë së Vendeve të Ulëta, René van der Linden.
Ai u shpreh se konstatonte me kënaqësi ndryshimet e jashtëzakonshme të ndodhura në Shqipëri që nga vizita e tij e parë në vitet ’90, si dhe shtoi se kishte ndjekur me vëmendje dhe kishte asistuar në procese të rëndësishme të Shqipërisë, si pranimi në Këshillin e Evropës, anëtarësimi në NATO, procesi i liberalizimit të vizave, si dhe procesi i integrimit evropian.
Më tej, kryetari i Senatit të Mbretërisë së Vendeve të Ulëta u shpreh se e konsideronte një detyrë të Holandës dhe vendeve të zhvilluara ndihmesën në zhvillimin e Shqipërisë. Ai mbështeti dhe inkurajoi kryeministrin Berisha për ndërmarrjen e reformave të nevojshme për modernizimin e vendit dhe integrimit në Bashkimin Evropian.
Kryeministri nga ana e tij, e falënderoi Linden për ndihmën e madhe që Holanda ka dhënë gjatë të gjithë periudhës së tranzicionit për qeverinë dhe popullin shqiptar, duke theksuar vlerën e madhe të kësaj ndihme në transformimin e vendit dhe të shoqërisë shqiptare.
Ai shprehu gjithashtu vullnetin e plotë të qeverisë së drejtuar prej tij në plotësimin e të gjitha detyrimeve dhe kryerjen e të gjitha reformave pasi theksoi se procesi i integrimit evropian është një proces që duhet të bazohet vetëm në meritë, performancë dhe arritjen e standardeve evropiane.
Kryeministri tha se reformat e viteve të fundit kanë sjellë atë transformim dhe modernizim të vendit që tashmë është i prekshëm nga të gjithë dhe siguroi vazhdimësinë në këtë rrugë.
Gjithashtu, Berisha i bëri një ekspoze të zhvillimeve politike në vend dhe e njohu bashkëbiseduesin me ofertat e mazhorancës drejtuar opozitës duke shprehur vlerësimin dhe respektin më të madh për kontributin e një opozite konstruktive në progresin e vendit.
n.e/NOA
