Përmet, 28 tetor, NOA – Një person është arrestuar në flagrancë në fshatin Piskovë të Përmetit, pasi në polici mbërriti një telefonatë nga dikush se po e kërcënon me armë kunati i vet.
Ngjarja e raportuar për agjencinë e Lajmeve NOA nga burimet policore, vijon më tej me faktin se menjëherë pas telefonatës, në drejtim të fshatit Piskovë janë nisur forcat e policisë të Përmetit, të cilët pasi kanë marrë të gjitha informacionet rreth saj, kanë bërë rrethimin e banesës së autorit, i cili është Syrja Hoxha.
Pas disa minutash, forcat e policisë kanë bërë të mundur arrestimin e tij, pasi ai nuk bëri rezistencë ndaj tyre, duke i bllokuar dhe sekuestruar një automatik model 56 “Kallashnikov” dhe tre krehra me fishekë.
Nga veprimet e para hetimore, rezultoi se Syrja Hoxha ka kërcënuar me armën e zjarrit kunatën e vet (nusen e vëllait), me inicialet E.H, për motive pronësie.
Nga ana e policisë, u kryen të gjitha veprimet e para hetimore, si edhe u bë arrestimi në flagrancë i Hoxhës, 50-vjeçar, lindur dhe banues në Piskovë të rrethit Përmet, si dhe u sekuestruan në cilësinë e provës materiale arma e zjarrit dhe krehrat me fishekë.
Arrestimi u bë për veprën penale të “Kanosje” dhe “Mbajtje e armëve dhe municioneve pa leje”, vepra këto të parashikuara nga nenet 278 e 84 të Kodit Penal.
n.e/NOA
