Tiranë, 30 tetor, NOA – Për një periudhë 5-ditore, në të gjithë vendin do të shënohen ndërprerje të energjisë elektrike, lajm ky i bërë me dije nga kompania çeke CEZ, e cila e lidh atë me punimet që do të kryhen në linjën Elbasan-Kashar.
Konkretisht, Operatori i Sistemit të Transmetimit për pesë ditë me radhë, do të punojë për shtrirjen e përcjellësit të linjës 400 kilovolt Elbasan-Kashar, gjë e cila do të shkaktojë edhe stakimin e përkohshëm të dy linjave 220 kilovolt dhe disa linjave prej 110 kilovolt të energjisë elektrike.
Siç mësohet, ndërprerja e energjisë elektrike do të fillojë që nga dita e sotme, duke vijuar me luhatje të furnizimit për gjithë vendin deri në datën 3 nëntor, kur edhe do të shënohet përfundimi i procesit të lartpërmendur.
Konkretisht, stakimet e energjisë elektrike do të fillojnë të kryhen nga ora 07:30 deri në orën 17:00 dhe do të prekin kryesisht zonat rurale dhe periferike të vendit.
Në një kohë që Operatori i Sistemit të Shpërndarjes ka njoftuar se do të angazhohet të marrë të gjitha masat për të siguruar furnizimin me energji të institucioneve me rëndësi jetike.
n.e/NOA
