Prishtinë, 30 tetor, NOA - Qeveria e Kosovës e ka përshëndetur vendimin e Aleancës së Atlantikut të Veriut për reduktimin e trupave në Kosovë, nga 10 mijë të tilla që janë aktualisht në territorin e vendit të saj, në 5 mijë.
“Ky vendim është edhe një dëshmi se në Kosovë gjendja e sigurisë është e lartë, dhe se institucionet e sigurisë po i zhvillojnë me sukses kapacitetet e veta”, thuhet në deklaratën përkatëse që qeveria e Kosovës ka lëshuar me një rast të tillë.
Duke shtuar se ajo e mirëpret ristrukturimin gradual të KFOR-it në një forcë edhe më të lëvizshme, më fleksibile dhe me kapacitete të larta.
Në fund të deklaratës, qeveria e Kosovës nuk ka harruar as edhe të falënderojë të gjithë ushtarët e KFOR-it për shërbimin profesional të tyre ndaj gjithë qytetarëve të Kosovës.
Lajmi për reduktimin e trupave ushtarake të KFOR-it, u komunikua dje nga vetë shefi i Aleancës, Rasmussen, sipas të cilit, një masë e tillë po ndërmerret pasi Kosova po tregon përmirësim të shkallës së saj të sigurisë.
n.e/NOA
