Tiranë, 1 nëntor, NOA - Kryeministri Berisha priti sot në takim, kryetarin e Partisë Aleanca Kosova e Re (AKR), Bexhet Pacolli dhe nënkryetaren e kësaj partie, Mimoza Kusari.
Gjatë takimit, Pacolli e informoi kryeministrin Berisha për situatën e krijuar në Kosovë pas zhvillimeve të fundit politike.
Ai theksoi se mocioni i mosbesimit i paraqitur nga AKR synon që ta sjellë situatën politike në një normalitet institucional.
Ndër të tjera, Pacolli u shpreh se AKR e ka mbështetur qeverinë e Kosovës në të shkuarën, me synim forcimin e institucioneve dhe ndërtimin e shtetit ligjor.
Nga ana e tij, kryeministri Berisha vlerësoi se zhvillimet në Kosovë reflektojnë zhvillime normale të një shteti demokratik ku problemet politike trajtohen brenda kuadrit institucional kushtetues.
Kryeministri siguroi për mbështetjen e plotë të qeverisë shqiptare në procesin e njohjes së shtetit të Kosovës, duke vënë në dispozicion të gjitha resurset e veta diplomatike.
Duke vlerësuar vendimin e GJND-së dhe rezolutën e OKB-së, Berisha nënvizoi rëndësinë e madhe që kanë të dyja proceset, si ai i njohjes së mëtejshme të shtetit të Kosovës ashtu edhe dialogun me Beogradin.
Në takim, u diskutua dhe për çështje që kanë të bëjnë me forcimin dhe zgjerimin e bashkëpunimit në fusha me interes të përbashkët.
n.e/NOA
