Tiranë, 6 Nëntor, NOA – Shoqata për Mbrojtjen e Konsumatorëve, një ditë pasi anëtarët e Parlamentit Europian theksuan se deputetët shqiptarë kanë “imunitet të pakufizuar”, deklaron me shqetësim se imuniteti i deputetëve shqiptarë është akoma dhe më absurd duke kapërcyer kufijtë politikë dhe duke u kthyer edhe në një imunitet fiskal doganor. Kështu, sipas saj, çdo konsumator shqiptar kur blen një pajisje elektronike në një shtet të BE mbi vlerën 50 euro, është i detyruar që të paguajë 20% taksë doganore.
Po asht,u nëse ai blen një automjet 30.000 Euro është i detyruar që të paguajë taksën doganore prej 20%.
Por nëse një deputet shqiptar blen çdo lloj pajisje apo çdo lloj makine, atëherë ai nuk paguan taksë doganore.
“Ky është një absurditet shqiptar ku pabarazia e konsumatorëve vendoset me ligj duke shkelur çdo ligj të barazisë të shtetasve”, citon ZMK..
Duke shtruar pyetjen në deklaratën e saj se në çfarë pike kemi arritur duke krijuar super-konsumatorët deputetë që paguajnë më pak se ne konsumatorët e thjeshtë?
“Kush janë këta super-qytetarë që s’paguajnë çmimin e mallit njësoj si ne të tjerët? Çfarë kanë ata më shumë se ne? Rrogat! Po ato i kanë më shumë se ne”, citon me shqetësim deklarata e ZMK-së.
Për këtë arsye, Shoqata për Mbrojtjen e Konsumatorëve u paraqit sot përballë Parlamentit Shqiptarë në një protestë simbolike me një manekin me sy të mbyllura, veshë të mbyllur, dhe gojë të mbyllur, me një tabelë të varur në qafën e manekinit që shkruhej: “Të drejtat e konsumatorëve shqiptarë janë: Mos Shih = Mos u Informo. Mos dëgjo = Mos u Eduko. Mos Fol = Mos u Anko!”.
n.e/NOA
