Tiranë, 20 nëntor, NOA – Ndryshimet tarifore të disa produkteve, ndër të cilat edhe mbeturinat urbane, llumrat e ujërave të zeza dhe mbeturinat klinike, janë pjesë e detyrimeve të Shqipërisë në Organizatën Botërore të Tregtisë.
Kështu ka pohuar në një deklaratë për shtyp, ministria e Ekonomisë dhe Tregtisë, pas protestave të organizuara sot kundër heqjes së taksave për importimin e plehrave, duke thënë se Shqipëria ka detyrime para OBT-së që në vitin 2000 kur u bë anëtare e saj me të drejta të plota.
“Shqipëria nuk është kosh plehrash”, ishte një nga parullat më të përdorura nga pjesëmarrësit në protestë.
Ndërsa METE u shpreh se gjatë procesit të përgatitjes së përgjigjeve të Pyetësorit të Bashkimit Evropian për kapitullin 30, doli që një grup produktesh kishte ndryshim në tarifën e zbatuar dhe angazhimit në OBT.
“Kjo ka ndodhur pasi gjatë viteve, në përputhje me orientimet e Organizatës Botërore të Doganave, kode të ndryshme tarifore i nënshtrohen procesit të korelimit dhe kodet tarifore që po propozohen të ndryshohen, tani gabimisht nuk kanë arritur t’i nënshtrohen procesit të ndryshimit të tarifës doganore më parë”, citon deklarata e METE-s.
Duke përfunduar se “Shqipëria e ka shprehur qartë vullnetin e saj për t’iu përgjigjur të gjitha angazhimeve të marra në kuadër të OBT-së, aq më tepër kur periudha tranzitore për Shqipërinë ka përfunduar në vitin 2009 dhe kështu, ndryshimi është i domosdoshëm”.
n.e/NOA
