Tiranë, 21 nëntor, NOA – Kryeministri Sali Berisha në një konferencë të posaçme për shtyp pas kthimit nga Lisbona deklaroi se gjate dy diteve te samitit Lisbona ishte kryeqyteti i politikes dhe i reformave të mëdha për NATO-n dhe sigurimin e paqes në botë.
Kryeministri Berisha theksoi se për Shqipërinë kjo ishte pjesëmarrja në samitin më të rëndësishëm në historinë e shtetit shqiptar, pasi në Lisbonë u mbajtën katër samite të lidhur ngushtë me njëri tjetrin, samiti i NATO-s për të miratuar dokumentin themelor, që përcakton reformat e nevojshme, rreziqet aktuale dhe perspektive, rolin dhe misionin e Aleancës gjatë shekullit, rrugët dhe mjetet për arritjen e sigurisë dhe paqes në botë.
Sipas Berishës, ky samit i Lisbonës, është samiti më i rëndësishëm në historinë e aleancës së Atlantikut të Veriut pas atij të themelimit të NATO-s, 61 vjet më parë.
“Aty u bë një rivlerësim i rreziqeve potenciale të sotme dhe atyre që do të vijnë. U vu theksi te terrorizmi ndërkombëtar, tek sulmet kibernetike, tek garantimi i rrugëve të sigurisë, dhe aleanca vendosi mbrojtjen antiraketë, në mënyrë që asnjë grup terrorist të mos mundë të imagjinojë të nisë një sulm në drejtim të vendeve të NATO-s me raketa balistike”, tha kryeministri Berisha.
Në këtë samit u rikonfirmua politika e dyerve të hapura të NATO-s, pohoi kryeministri, duke shtuar se NATO shpreh angazhimin e saj për të vazhduar kontributin për paqen dhe sigurinë në rajon dhe për procesin e integrimit të vendeve të tjera në këtë aleancë.
“NATO me dokumentin e ri strategjik, qëndron më lart se kurrë në vizionin, vendosmërinë dhe mjetet, me të cilat ajo do të mbrojë stabilitetin e vendeve anëtare.
"Dokumenti mori mbështetje unanime, për vitalitetin dhe aftësitë që aleanca dëshmoi nën drejtimin e SHBA-ve “, tha Berisha.
Në këtë samit unë mora fjalën time për herë të parë, si një vend i barabartë dhe aleate e NATO-s, ku shpreha garancinë për reforma të mëtejshme të qeverisë në luftën ndaj terrorizmit. Vijon...
mit/NOA
