Tiranë, 21 nëntor, NOA – Pjesa jugore e tunelit të Thirrës në afërsi të Kalimashit ka marrë flakë sot duke shkaktuar një bllokim të tunelit për plot gjysmë ore.
Ministria e Punëve Publike dhe Transportit përmes një deklarate për shtyp deklaroi se zjarri erdhi si pasojë e djegies së një baterie.
Zjarri ra në orën 11:45 min, në njërën nga dhomat teknike të Galerisë Jugore të tunelit të Thirrës, ku janë të instaluara transformatorët dhe sistemet back-up të energjisë, për shkak të një avarie teknike.
Ministria e Transporteve theksoi më tej se operatori i tunelit në bashkëpunim me forcat e zjarrfikësve kanë bllokuar qarkullimin me qëllim të ruajtjes së sigurisë në tunel.
Bllokimi sipas ministrisë zgjati për rreth 30 minuta, kohë gjatë të cilës zjarrfikësit shuna zjarrin e rënë dhe evakuuan gazrat, ndërsa u verifikuan edhe sistemet e sigurisë në hapsirën e tunelit.
Ministria e transporteve sqaroi më tej se kjo pjesë e tunelit të Thirrës u zhbllokua duke sjellë në normalitet edhe trafikun vetëm në orën 12:15 min, pra gjysmë ore pas rënies së zjarrit në galerinë jugore të tunelit të Thirrës.
Ashtu sikundër mund të kuptohet për gati një orë trafiku në tunelin Kalimash-Thirrë ka qenë i bllokuar gjatë defektit, e për rrjedhojë një varg i tërë automjetesh kanë pritur deri sa ai të rihapej.
mit/NOA
