Tiranë, 22 nëntor, NOA – Ndërsa qeveria deklaron se Shqipëria po kthehet në një destinacion të kërkuar turistik, opozita rishtas e ka kritikuar se qeveria në fakt nuk po bën asgjë për mbrojtjen e mjedisit dhe pastrimin e mbeturinave në vend.
Deputeti i Partisë Socialiste, Ilir Beqja në komisionin parlamentar të veprimtarisë prodhuese, hodhi kritika lidhur me faktin se industria e riciklimit në Shqipëri është përqendruar rreth portit të Durrësit, si porti lidhës me Italinë.
Sipas deputetit socialist, industria e riciklimit e projektuar fort nga qeveria nuk zgjidh problemin e pastrimit të mbeturinave në vend, pasi kjo industri do të riciklojë plehra të importuara dhe jo plehra të gjeneruara në vend.
Në këtë këndvështrim, gjatë diskutimit të projektbuxhetit të vitit 2011 dhe fondeve të parashikuara për mjedisin, deputeti i opozitës tha në draftin e paraqitur nga qeveria nuk parashikohen fonde për pastrimin e plehrave duke i mëshuar faktit se qeveria nuk po i sheh me vëmendjen e duhur investimet për mbrojtjen e mjedisit nga ndotja.
Sipas deputetëve socialistë fondi prej 408 milionë lekësh i parashikuar për mjedisin në projektbuxhetin e vitit 2011 është i pamjaftueshëm.
Projektbuxheti i 2011-ës, pritet të kalojë për diskutim në seancën plenare të së enjtes, më 25 nëntor.
mit/NOA
