Tiranë, 23 nëntor, NOA – Këshilli i Lartë i Drejtësisë do t`i propozojë ministrit të Drejtësisë masa disiplinore për disa gjyqtarë.
Një fakt të tillë, ky institucion e ka përcaktuar në një letër të posaçme, lajm ky i konfirmuar nga vetë nënkryetari i tij Kreshnik Spahiu, sipas të cilit, propozimi i KLD-së vjen pas inspektimit të punës së gjyqtarëve ku sipas tij janë konstatuar një sërë problemesh dhe shkelje nga ana e gjyqtarëve.
Gjithashtu Spahiu theksoi se janë verifikuar disa ankesa të qytetarëve dhe janë verfikuar edhe çështjet e 360 gjyqtarëve. Një masë e tillë është ndërmarrë në kuadrin e inspektimeve nëpër gjykata, ku mes tyre do të vijojnë edhe ato në qytetet e Durrësit, Vlorës dhe Shkodrës.
Këshilli i Lartë i Drejtësisë është përfshirë në verifikimin e mijëra dosjeve të gjykuara nga 360 gjyqtarë të 30 gjykatave të Shkallës së Parë dhe të Apelit në mbarë vendin.
n.e/NOA
