Moskë, 23 nëntor, NOA - Vizita e Kryetares së Kuvendit, Jozefina Topalli në Rusi ka shërbyer për të evidentuar pikat e mundshme të bashkëpunimit mes dy vendeve.
Gjatë qëndrimit dy ditor në Moskë, Jozefina Topalli, së bashku me delegacionin që kryesonte, zhvilloi një takim në Komitetin për Politikën e Jashtme të Dumës, ku u prit nga Kryetari i tij Kostantin Kozacov.
Kozacov dhe zonja Topalli ndanë të njëjtin mendim se duhet rikuperuar koha e humbur dhe se dy vendet duhet të trajtojnë çështje me interes reciprok, duke eksploruar mundësitë e bashkëpunimit konkret.
“Unë në mesin e Dhjetorit do të vizitoj Shqipërinë, për herë të dytë brenda pak viteve, çka dëshmon vullnetin tonë për të thelluar shkëmbimin e kontakteve dhe përvojave, duke zhvilluar marrëdhëniet dhe duke i shtyrë ato përpara”- u shpreh Kozacov.Kryetari i Komitetit për Politikën e Jashtme në Dumën ruse vlerësoi nismat dhe rolin aktiv të Shqipërisë në rajon.
Duke bërë një ekspoze të zhvillimeve në Shqipëri, Topalli u fokusua tek reformat dhe hapat konkretë të ndërmarrë nga Shqipëria në procesin e integrimit evropian.
Në këtë kontekst, zonja Topalli vlerësoi qëndrimin pozitiv të Rusisë për zgjerimin e Bashkimit Evropian me vendet e Ballkanit Perëndimor.
Kryetarja e Kuvendit tha se pret me kënaqësi vizitën e Kozacov në Tiranë, vizitë gjatë së cilës ai do të prekë nga afër progresin dhe ndryshimin e arritur në Shqipëri.
a.k/NOA
