Shkup, 24 nëntor, NOA - Asnjë artist dhe institucion kulturor shqiptar nuk është ftuar në manifestimet “Ditët e Kulturës Maqedonase” në Britani të Madhe, një projekt i financuar nga qeveria e Maqedonisë.
Siç mëson agjencia e lajmeve INA, rreth 40 artistë maqedonas, grupe muzikore, shkrimtar dhe autor filmash deri më 28 Nëntor do të prezantojnë të arriturat dhe potencialet e kulturës së republikës së Maqedonisë, ndërsa mungon përfaqësimi i kulturës shqiptare.
Në këtë manifestim, ministria e Kulturës ka siguruar një prezantim të kulturës turke, nëpërmjet Teatrit Turk të Shkupit me një shfaqje teatrale.
Në shënimin e këtyre manifestimeve në Londër po merrë pjesë edhe kryeministri Nikolla Gruevski, ministrja e Kulturës, Elizabeta Kançevska – Mileska. Shumica e manifestimeve do të organizohen pranë qendrës kulturore “Tabernakul” në Londër.
Koncerte të muzikës klasike, koncerte folklori dhe etno muzikës, ekspozita, shfaqje teatrale, dhe promovim librash, etj.
Ky është diskriminimi i radhës që bën Qeveria dhe Ministria e Kulturës e Maqedonisë, pas skandalit të njejtë ku nuk ishte ftuar asnjë artist apo institucion kulturor shqiptar në ditët e kulturës maqedonase në SHBA, që u mbajtën muajin e kaluar.
NOA-INA
