Prishtinë, 26 nëntor, NOA - Lëvizja Qytetare Zgjohu! mirëpret projektin për ndërtimin e autostradës Prishtinë-Shkup dhe lidhjes së dy kryeqendrave shqiptarë të Kosovës dhe Maqedonisë, pas lidhjes së Tiranës me Prishtinën nëpërmjet Rrugës së Kombit.
Pas lajmërimit për ndërtimin e autostradës së lartpërmendur, mbetet të ndërtohet edhe Rruga e Arbrit në Maqedoni për ta kompletuar trekëndëshin shqiptar Tiranë-Prishtinë-Shkup me infrastrukturë moderne rrugore, që do të lehtësojë qarkullimin e njerëzve dhe mallrave dhe do t’i bashkojë shqiptarët si asnjëherë më parë.
Urojmë që ky projekt bashkë me Rrugën e Arbrit të realizohen sa më shpejt në mënyrë që lidhjet ndërshqiptare të intensifikohen dhe të përafrohen realitetet shqiptare të Shkupit, Tiranës dhe Prishtinës duke i shndërruar ato në NJË.
Lëvizja Qytetare Zgjohu! nxit autoritetet e Tiranës, Prishtinës dhe Shkupit që të liberalizojnë kufijtë dhe të realizojnë qarkullimin e lirë të qytetarëve në kufijtë e këtyre tre vendeve vetëm me letërnjoftim.
Nëpërmjet shtrirjes së veprimtarisë së vet në Shkup, Prishtinë dhe Tiranë, Lëvizja Zgjohu! gjithashtu bën përpjekje për ta realizuar unifikimin e realiteteve tona dhe për t’i përafruar shqiptarët me njëri-tjetrin.
NOA-INA
