Prishtinë, 29 Nëntor, NOA – Teksa ishin duke i ndërruar flamujt e shtetit të Kosovës me flamujt kuq e zi të Shqipërisë, tre aktivistë të lëvizjes “Vetëvendosje” në Lipjan janë arrestuar nga forcat e Policisë së Kosovës.
Lajmi është bërë me dije nga mediat kosovare, sipas të cilave, të ndaluarit janë konkretisht aktivistët me emrat Nderim Matoshi, Astrit Fazliu dhe Qendrim Kastrati.
“Të lartpërmendurit u arrestuan nga dy policë civilë serbë, shumë afër stacionit policor dhe për momentin akoma janë nën arrest”, thuhet në komunikatën e lëshuar nga “Vetëvendosje” lidhur me një fakt të tillë.
“Kjo lëvizje e konsideron flamurin e Kosovës “flamur të kontrabanduar dhe të imponuar, për të cilin nuk është pyetur populli asnjëherë, andaj edhe nuk është i tij, prandaj ky aksion i Lëvizjes “Vetëvendosje” i nisur do të vazhdojë, në mënyrë që gjatë festës kombëtare, Ditës së Flamurit Kosova të jetë e dekoruar vetëm me flamuj kombëtarë”, citonte më tej deklarata e kësaj lëvizje lidhur me incidentin në fjalë.
Ndërkaq, sipas dëshimtarëve, në momentin e kryerjes së arrestimit, tre policët ishin pa uniformë.
n.e/NOA
