Mirditë, 1 dhjetor, NOA – Forcat e policisë së Mirditës kanë kryer arrestimin në flagrancë të 29-vjeçarit Besnik Ruçi, lindur dhe banues në fshatin Kulme të këtij rrethi.
Arrestimi i tij u bë për arsye se dje në mesditë, pas një konflikti për motive të dobëta në banesë me babain e tij Gjon Ruçi, 59-vjeç, e ka goditur me gurë në kokë duke i shkaktuar dëmtime të rënda në syrin e majtë.
Siç raportohet për agjencinë e Lajmeve NOA, për fat të mirë, i lënduari tani ndodhet në spitalin e Rrëshenit jashtë rrezikut për jetën.
Materialet rreth kësaj ngjarje do t’i referohen prokurorisë së Lezhës për veprën penale të “Plagosjes së rëndë me dashje”, parashikuar nga neni 88 i Kodit Penal, në ngarkim të Besnik Ruçit.
n.e/NOA
