Prishtinë, 1 dhjetor, NOA - Këshillat për Zhvillimin e Qendrave të Lëvizjes Vetëvendosje!, kanë themeluar dje katërmbëdhjetë pikat e radhës në lagjet e qyteteve dhe në fshatrat e komunave përkatëse.
Konkretisht, pikat u formuan në Prizren, Sharr, Viti, Besianë, Therandë, Gjakovë, Ferizaj, Lypjan, Burim dhe Malishevë.
Qindra qytetarëve të pranishëm në Prizren iu drejtua Albin Kurti, i cili e artikuloi programin politik të Lëvizjes për shtetndërtim dhe zhvillim ekonomiko-shoqëror.
Ai foli për nevojën e mobilizimit shoqëror me qëllim të krijimit të një qytetarie aktive që do ti kundërshtonte proceset negative që vijnë si rezultat i mohimit të vullnetit politik të popullit.
Pas prezantimit të programit politik, pjesa më e madhe e tubimit u orientua në bashkëbisedimin me pjesëmarrësit e shumtë, me ç’rast qytetarët e kësaj lagjeje parashtruan shumë pyetje dhe komente rreth brengave të tyre të përditshme.
Duke elaboruar aktualitetin politik dhe shoqëror, Albin Kurti theksoi domosdoshmërinë e të qenit bashkë për t’ia ndërruar karakterin shtetit, si dhe për nevojshmërinë e ndërrimit të kursit politik të deritanishëm, i cili ishte në shërbim të pasurimit individual të politikanëve në kurriz të popullit të varfër dhe jo në shërbim te mirëqenies kolektive.
n.e/NOA
