Prishtinë, 2 Dhjetor 2010 NOA / Rid Bulku - Kryeministri i Republikës së Kosovës urdhëron që efektiva të Forcës së Sigurisë së Kosovës të dislokohen në Shkodër. Ata do të dërgohen në Veriun e Shqipërisë për të ndihmuar popullatën nga vërshimet, konfirmoi zyrtarisht për agjencinë NOA, zyra e kryeministrit në Prishtinë.
Bëhet e ditur se urdhri i shpallur erdhi pak pasi Kryeministri i Qeverisë së Republikës së Kosovës, Hashim Thaçi zhvilloi një bisedë sot me Kryeministrin e Republikës së Shqipërisë, Sali Berisha, lidhur me vërshimet e mëdha që po u shkaktojnë dëme qytetarëve të veriut të Shqipërisë.
Të dy kryeministrat u dakorduan që kjo fatkeqësi njerëzore thërret për solidarizim dhe veprim të përbashkët emergjent dhe humanitar.
“Kryeministri Thaçi i premtoi homologut Berisha mbështetjen e qytetarëve të Kosovës dhe ndihmën aktive të Qeverisë së Kosovës”, - ishte konfirmimi zyrtar.
Për këtë qëllim, Kryeministri Thaçi kërkuar që efektivat e Forcës së Sigurisë së Kosovës të dislokohen në Shkodër. Bëhet e ditur se këto forca do të mbërrijnë në terren nesër (3 dhjetor), duke treguar kështu ndjenjat e unitetit, humanizmit dhe vëllazërisë.
Sakaq po nsër në orën 10.00, Kryeministri i Republikës së Kosovës, Hashim Thaçi do t’u drejtohet qytetarëve të Kosovës për t’i njoftuar për të rejat dhe për gjendjen e krijuar, duke nënvizuar se “këto janë çaste kur të gjithë shqiptarët duhet të jenë të bashkuar”.
r.b/NOA
