Tiranë, 2 dhjetor, NOA – Situata emergjente e krijuar nga përmbytjet në Shkodër ka bërë që Kuvendi të shtyjë punimet normale gjatë seancës së sotme. Drejtoria e Shërbimeve dhe Marrëdhënieve me Publikun në Kuvend deklaroi se “për shkak të situatës së fatkeqësisë natyrore në zonën e Shkodrës, seanca plenare e ditës së sotme shtyhet për në orën 19:00 pasdite”.
Arsyet e shtyrjes kanë të bëjnë me faktin e drejtuesit më të lartë të qeverisë janë në Shkodër, duke ndjekur nga afër operacionin për evakuimin e njerëzve si dhe për marrjen masave urgjente nga shtabi i ngritur për këtë situatë.
Aktualisht në Shkodër janë kryeministri Sali Berisha, Kryetarja e Kuvendit Jozefina Topalli, ministri i Brendshëm Lulzim Basha, si dhe mjaft ministra dhe deputetë të qarkut Shkodër dhe anëtarë të tjerë të Kuvendit.
Këto mungesa e kanë bërë të pamundur nisjen e punimeve të seancës së sotme Parlamentare në orarin e përcaktuar më parë.
Gjatë ditës së sotme në punimet e Kuvendit është parashikuar të diskutohet për miratimin nen për nen të buxhetit të vitit 2011.
a.k/NOA
