Shkup, 5 Dhjetor 2010 - Kreu i Lidhjes Social-Demokrate të Maqedonisë Branko Cërvenkovski ka porositur në protestën e opozitës në Shkup se nuk do të “pajtohet me mjerimin dhe varfërinë”, ndërkaq e ka akuzuar qeverinë për krimet ne vend.
“Kriminelët më të mëdhenj në vend paraqiten si demokratë, ndërsa kryeministri Nikolla Gruevksi shtyp të gjitha institucionet për të zbatuar politikën e tij”, ka thënë Cërvenkovski në protestën e opozitës.
Ai ka thënë se Maqedonia “po pëson humbje në të gjitha fushat”, duke akuzuar qeverinë se ka shkaktuar ndarje mes qytetarëve.
Protesta në Shkup e mbajtur nën slloganin “Marshi për demokracinë” ka përfunduar pa incidente, ndërsa opozita këmbëngul se në protestë morën pjesë 50 mijë njerëz nga tërë Maqedonia.
Opozita kërkoi mbajtjen e zgjedhjeve të parakohshme, citon radio Evropa e Lirë.
