Shkodër, 7 dhjetor, NOA – Kryetarja e Kuvendit ka kërkuar sot nga banorët e Shkodrës që të mirëkuptojnë veprimet e forcave të policisë dhe të ushtrisë, si dhe të zbatojnë udhëzimet e tyre, me qëllim që të mos ketë asnjë humbje në jetë njerëzish.
Deklarata e kryeparlamentares u bë gjatë vizitës që zhvilloi paraditen e sotme me Kryeministrin Sali Berisha dhe ministrat e qeverisë në mbledhjen e Shtabit të Emergjencave në Prefekturën e Shkodrës.
Në qendër të diskutimeve ishin masat që po merren orë pas ore, ditën dhe natën për evakuimin e banorëve, gjësë së gjallë dhe furnizimit me ushqime, ujë të pijshëm dhe me ilaçe nëpërmjet helikopterëve dhe mjeteve motorike nga toka dhe uji.
Kryetarja e Kuvendit sërish shprehu konsideratat dhe falenderimet e veçanta për solidaritetin e jashtëzakonshëm që po tregojnë qytetarët shkodranë dhe të gjithë Shqipërisë, në mbështetje të kësaj situate të vështirë.
Në të gjitha zonat e përmbytura, ushtria, policia, forcat speciale, bluzat e bardha dhe të gjitha strukturat e shtetit, janë në gatishmëri të plotë në mbështetje të çdo kërkese dhe nevoje të banorëve të prekur nga përmbytja.
a.k/NOA
