Kinë, 9 dhjetor NOA - Kanë qenë të paktën 26 persona që kanë vdekur në një shpërthim që ka ndodhur në një minierë qymyri në provincën e Henan, në Kinën qendrore. Lajmi është bërë i ditur nga agjencia Kina e Re.
Incidenti ndodhi në një minierë në Mianchi, rreth 300 kilometra larg nga kryeqyteti provincial, Zhengzhou.
Sipas agjencisë së lajmeve Kina e re, në kohën e incidentit 46 punëtorë ishin duke punuar në minierë, ndërsa 20 të tjerë arritën të shpëtonin.
E njohur në të shkuarën si “'Suzhuang”, miniera kishte kaluar në pronësi të grupit shtetëror Yi Ma dhe ishte në fazë rinovimi.
Miniera, e cila prodhon 150 mijë tonelata qymyr në vit, me sa duket nuk ishte e autorizuar të vazhdonte punimet në këtë periudhë të ristrukturimit.
r.b/NOA
